落街睇吓

落街睇吓
有幾多啪丸索K
有幾多援交
唔多
唔好呼天搶地啦

睇清楚   縐埋眉頭走來撲去
炒番兩手
爭住買樓失控搬去
名校區   無端端
喘住氣話唔好輸比上海廣州
呢啲仲多
曾蔭權話救得一個得一個
救邊個先你話
如果嗰啲大嘅唔趕住起條鐵路
搞乜一小時生活圈
就唔使一日到晚趕呀忙呀
忙到唔記得啲細既
大嘅忘記細嘅細嘅先會去忘我
呀然後又俾人話佢哋唔自愛
你落街睇吓
啪丸多還是炒股多   索K多
還是地產多援交多還是
金融產品多   笑臉迎人你以為
淨係一樓一   睇清楚阿伯婆婆
你啲定期好少息不如嗱囉咁
你問佢嗱囉咁係點佢咪
望下上面再上面又上面然後
仲有上面嗰啲   你話啦咁高咁遠
傳到落來都唔知嗱囉咁係乜總知
大家合作返工上癮買嘢瘋狂
報course猛烈然後慨嘆世風日下
痛心青春如此暗無天日
焦慮比失禁還失禁
都係嗰啲
縐埋眉頭為兒為女
為日後讀大學唔係日後
點同人競爭仲有上面落來啲
尖子yeah
爭得到都係得個毫子買紅棗


不如落街睇吓
街市豬肉佬手起刀落師奶拎住
條魚   返屋企一邊諗蒸好
還是煎好   睇吓
紅綠燈前阿伯同人打招呼
細路望住另一個細路想同佢玩
後面街阿婆等緊人哋俾報紙
揾食艱難不過c’est la vie
陽光係老實既暖又好熱又好
能夠照住就照住
蔭天落雨都一樣
老實    眾生如是
打手電既姿態同耕田其實差唔多
拍拖後生同考試後生差唔多
送外賣同企喺街邊睇報紙
攞住袋橙同拖住個細路你話係咪
生話呢喺時間既畫框留低既畫面
落街睇吓你見到一架BB車裏面有個BB仔
佢望住個天呵呵你唔明唔緊要
咁你咪望實個地同自己講
個地實淨喎好啦行落去啦



雄仔叔叔
Sept 09